Yassa jīvitindriyaṁ uppajjati tassa somanassindriyaṁ uppajjissatīti? Pacchimacittassa uppādakkhaṇe yassa cittassa anantarā upekkhāsampayuttapacchimacittaṁ uppajjissati tassa cittassa uppādakkhaṇe tesaṁ jīvitindriyaṁ uppajjati, no ca tesaṁ somanassindriyaṁ uppajjissati. Itaresaṁ upapajjantānaṁ pavatte cittassa uppādakkhaṇe tesaṁ jīvitindriyañca uppajjati somanassindriyañca uppajjissati. Yassa vā pana somanassindriyaṁ uppajjissati tassa jīvitindriyaṁ uppajjatīti? Sabbesaṁ cavantānaṁ pavatte cittassa bhaṅgakkhaṇe tesaṁ somanassindriyaṁ uppajjissati, no ca tesaṁ jīvitindriyaṁ uppajjati. Sabbesaṁ upapajjantānaṁ pavatte cittassa uppādakkhaṇe tesaṁ somanassindriyañca uppajjissati jīvitindriyañca uppajjati. Yassa jīvitindriyaṁ uppajjati tassa upekkhindriyaṁ uppajjissatīti? Pacchimacittassa uppādakkhaṇe yassa cittassa anantarā somanassasampayuttapacchimacittaṁ uppajjissati tassa cittassa uppādakkhaṇe tesaṁ jīvitindriyaṁ uppajjati, no ca tesaṁ upekkhindriyaṁ uppajjissati. Itaresaṁ upapajjantānaṁ pavatte cittassa uppādakkhaṇe tesaṁ jīvitindriyañca uppajjati upekkhindriyañca uppajjissati. Yassa vā pana upekkhindriyaṁ uppajjissati tassa jīvitindriyaṁ uppajjatīti?