Yassa purisindriyaṁ na uppajjati tassa saddhindriyaṁ …pe… paññindriyaṁ …pe… manindriyaṁ na uppajjissatīti? Sabbesaṁ cavantānaṁ na purisānaṁ upapajjantānaṁ tesaṁ purisindriyaṁ na uppajjati, no ca tesaṁ manindriyaṁ na uppajjissati. Kāmāvacare parinibbantānaṁ rūpāvacare arūpāvacare pacchimabhavikānaṁ tesaṁ purisindriyañca na uppajjati manindriyañca na uppajjissati. Yassa vā pana manindriyaṁ na uppajjissati tassa purisindriyaṁ na uppajjatīti? Pacchimabhavikānaṁ purisānaṁ upapajjantānaṁ tesaṁ manindriyaṁ na uppajjissati, no ca tesaṁ purisindriyaṁ na uppajjati. Kāmāvacare parinibbantānaṁ rūpāvacare arūpāvacare pacchimabhavikānaṁ tesaṁ manindriyañca na uppajjissati purisindriyañca na uppajjati. (Purisindriyamūlakaṁ.) Yassa jīvitindriyaṁ na uppajjati tassa somanassindriyaṁ na uppajjissatīti? Sabbesaṁ cavantānaṁ pavatte cittassa bhaṅgakkhaṇe tesaṁ jīvitindriyaṁ na uppajjati, no ca tesaṁ somanassindriyaṁ na uppajjissati. Pacchimacittassa bhaṅgakkhaṇe yassa cittassa anantarā upekkhāsampayuttapacchimacittaṁ uppajjissati tassa cittassa bhaṅgakkhaṇe tesaṁ jīvitindriyañca na uppajjati somanassindriyañca na uppajjissati. Yassa vā pana somanassindriyaṁ na uppajjissati tassa jīvitindriyaṁ na uppajjatīti?