Yassa yattha jīvitindriyaṁ na uppajjati tassa tattha manindriyaṁ na uppajjatīti? Āmantā. Yassa vā pana yattha manindriyaṁ na uppajjati tassa tattha jīvitindriyaṁ na uppajjatīti? Acittakānaṁ upapajjantānaṁ tesaṁ tattha manindriyaṁ na uppajjati, no ca tesaṁ tattha jīvitindriyaṁ na uppajjati. Sabbesaṁ cavantānaṁ pavatte cittassa bhaṅgakkhaṇe tesaṁ tattha manindriyañca na uppajjati jīvitindriyañca na uppajjati. (Jīvitindriyamūlakaṁ.) Yassa yattha somanassindriyaṁ na uppajjati tassa tattha upekkhindriyaṁ na uppajjatīti? Upekkhāya upapajjantānaṁ pavatte upekkhāsampayuttacittassa uppādakkhaṇe tesaṁ tattha somanassindriyaṁ na uppajjati, no ca tesaṁ tattha upekkhindriyaṁ na uppajjati. Sabbesaṁ cittassa bhaṅgakkhaṇe somanassavippayuttaupekkhāvippayuttacittassa uppādakkhaṇe asaññasattānaṁ tesaṁ tattha somanassindriyañca na uppajjati upekkhindriyañca na uppajjati. Yassa vā pana yattha upekkhindriyaṁ na uppajjati tassa tattha somanassindriyaṁ na uppajjatīti? Somanassena upapajjantānaṁ pavatte somanassasampayuttacittassa uppādakkhaṇe tesaṁ tattha upekkhindriyaṁ na uppajjati, no ca tesaṁ tattha somanassindriyaṁ na uppajjati. Sabbesaṁ cittassa bhaṅgakkhaṇe upekkhāvippayuttasomanassavippayuttacittassa uppādakkhaṇe asaññasattānaṁ tesaṁ tattha upekkhindriyañca na uppajjati somanassindriyañca na uppajjati.