Pañcavokārā cavantānaṁ acakkhukānaṁ kāmāvacaraṁ upapajjantānaṁ tesaṁ tattha cakkhundriyaṁ na uppajjati, no ca tesaṁ tattha somanassindriyaṁ na uppajjissati. Pañcavokāre parinibbantānaṁ asaññasattānaṁ arūpānaṁ ye ca sacakkhukā upekkhāya upapajjitvā parinibbāyissanti tesaṁ cavantānaṁ tesaṁ tattha cakkhundriyañca na uppajjati somanassindriyañca na uppajjissati. Yassa vā pana yattha somanassindriyaṁ na uppajjissati tassa tattha cakkhundriyaṁ na uppajjatīti? Pacchimabhavikānaṁ pañcavokāraṁ upapajjantānaṁ ye ca sacakkhukā upekkhāya upapajjitvā parinibbāyissanti tesaṁ upapajjantānaṁ tesaṁ tattha somanassindriyaṁ na uppajjissati, no ca tesaṁ tattha cakkhundriyaṁ na uppajjati. Pañcavokāre parinibbantānaṁ asaññasattānaṁ arūpānaṁ ye ca sacakkhukā upekkhāya upapajjitvā parinibbāyissanti tesaṁ cavantānaṁ tesaṁ tattha somanassindriyañca na uppajjissati cakkhundriyañca na uppajjati. Yassa yattha cakkhundriyaṁ na uppajjati tassa tattha upekkhindriyaṁ na uppajjissatīti? Pañcavokārā cavantānaṁ acakkhukānaṁ kāmāvacaraṁ upapajjantānaṁ arūpānaṁ tesaṁ tattha cakkhundriyaṁ na uppajjati, no ca tesaṁ tattha upekkhindriyaṁ na uppajjissati. Pañcavokāre parinibbantānaṁ arūpe pacchimabhavikānaṁ asaññasattānaṁ ye ca sacakkhukā somanassena upapajjitvā parinibbāyissanti tesaṁ cavantānaṁ tesaṁ tattha cakkhundriyañca na uppajjati upekkhindriyañca na uppajjissati. Yassa vā pana yattha upekkhindriyaṁ na uppajjissati tassa tattha cakkhundriyaṁ na uppajjatīti?