Ye sacakkhukā upekkhāya upapajjitvā parinibbāyissanti tesaṁ tattha somanassindriyaṁ na uppajjissati, no ca tesaṁ tattha cakkhundriyaṁ na uppajjissati. Pañcavokāre pacchimabhavikānaṁ asaññasattānaṁ arūpānaṁ tesaṁ tattha somanassindriyañca na uppajjissati cakkhundriyañca na uppajjissati. Yassa yattha cakkhundriyaṁ na uppajjissati tassa tattha upekkhindriyaṁ na uppajjissatīti? Arūpānaṁ tesaṁ tattha cakkhundriyaṁ na uppajjissati, no ca tesaṁ tattha upekkhindriyaṁ na uppajjissati. Pacchimabhavikānaṁ asaññasattānaṁ tesaṁ tattha cakkhundriyañca na uppajjissati upekkhindriyañca na uppajjissati. Yassa vā pana yattha upekkhindriyaṁ na uppajjissati tassa tattha cakkhundriyaṁ na uppajjissatīti? Ye sacakkhukā somanassena upapajjitvā parinibbāyissanti tesaṁ tattha upekkhindriyaṁ na uppajjissati, no ca tesaṁ tattha cakkhundriyaṁ na uppajjissati. Pacchimabhavikānaṁ asaññasattānaṁ tesaṁ tattha upekkhindriyañca na uppajjissati cakkhundriyañca na uppajjissati. Yassa yattha cakkhundriyaṁ na uppajjissati tassa tattha saddhindriyaṁ …pe… paññindriyaṁ …pe… manindriyaṁ na uppajjissatīti? Arūpānaṁ tesaṁ tattha cakkhundriyaṁ na uppajjissati, no ca tesaṁ tattha manindriyaṁ na uppajjissati. Pacchimabhavikānaṁ asaññasattānaṁ tesaṁ tattha cakkhundriyañca na uppajjissati manindriyañca na uppajjissati.