Sabbesaṁ cavantānaṁ na itthīnaṁ upapajjantānaṁ tesaṁ itthindriyaṁ na uppajjati no ca tesaṁ upekkhindriyaṁ na uppajjissati. Kāmāvacare parinibbantānaṁ rūpāvacare arūpāvacare pacchimabhavikānaṁ ye ca somanassena upapajjitvā parinibbāyissanti tesaṁ cavantānaṁ tesaṁ itthindriyañca na uppajjati upekkhindriyañca na uppajjissati. Yassa vā pana upekkhindriyaṁ na uppajjissati tassa itthindriyaṁ na uppajjatīti? Pacchimabhavikānaṁ itthīnaṁ upapajjantīnaṁ yā ca itthiyo somanassena upapajjitvā parinibbāyissanti tāsaṁ upapajjantīnaṁ tāsaṁ upekkhindriyaṁ na uppajjissati, no ca tāsaṁ itthindriyaṁ na uppajjati. Kāmāvacare parinibbantānaṁ rūpāvacare arūpāvacare pacchimabhavikānaṁ ye ca somanassena upapajjitvā parinibbāyissanti tesaṁ cavantānaṁ tesaṁ upekkhindriyañca na uppajjissati itthindriyañca na uppajjati. Yassa itthindriyaṁ na uppajjati tassa saddhindriyaṁ …pe… paññindriyaṁ …pe… manindriyaṁ na uppajjissatīti? Sabbesaṁ cavantānaṁ na itthīnaṁ upapajjantānaṁ tesaṁ itthindriyaṁ na uppajjati, no ca tesaṁ manindriyaṁ na uppajjissati. Kāmāvacare parinibbantānaṁ rūpāvacare arūpāvacare pacchimabhavikānaṁ tesaṁ itthindriyañca na uppajjati manindriyañca na uppajjissati. Yassa vā pana manindriyaṁ na uppajjissati tassa itthindriyaṁ na uppajjatīti?