Yattha akusalā dhammā na uppajjissanti tattha abyākatā dhammā na uppajjissantīti? Uppajjissanti. Yattha vā pana abyākatā dhammā na uppajjissanti tattha akusalā dhammā na uppajjissantīti? Natthi. 9.2.1.3.6. Paccanīkapuggalokāsa Yassa yattha kusalā dhammā na uppajjissanti tassa tattha akusalā dhammā na uppajjissantīti? Āmantā. Yassa vā pana yattha akusalā dhammā na uppajjissanti tassa tattha kusalā dhammā na uppajjissantīti? Yassa cittassa anantarā aggamaggaṁ paṭilabhissanti tesaṁ tattha akusalā dhammā na uppajjissanti, no ca tesaṁ tattha kusalā dhammā na uppajjissanti. Aggamaggasamaṅgīnaṁ arahantānaṁ asaññasattānaṁ tesaṁ tattha akusalā ca dhammā na uppajjissanti kusalā ca dhammā na uppajjissanti. Yassa yattha kusalā dhammā na uppajjissanti tassa tattha abyākatā dhammā na uppajjissantīti? Aggamaggasamaṅgīnaṁ arahantānaṁ asaññasattānaṁ tesaṁ tattha kusalā dhammā na uppajjissanti, no ca tesaṁ tattha abyākatā dhammā na uppajjissanti. Pacchimacittasamaṅgīnaṁ tesaṁ tattha kusalā ca dhammā na uppajjissanti abyākatā ca dhammā na uppajjissanti. Yassa vā pana yattha abyākatā dhammā na uppajjissanti tassa tattha kusalā dhammā na uppajjissantīti? Āmantā. Yassa yattha akusalā dhammā na uppajjissanti tassa tattha abyākatā dhammā na uppajjissantīti?