Sabbesaṁ cavantānaṁ aghānakānaṁ upapajjantānaṁ tesaṁ tattha ghānindriyaṁ na uppajjati, no ca tesaṁ tattha jīvitindriyaṁ na uppajjissati. Kāmāvacare parinibbantānaṁ rūpāvacare arūpāvacare pacchimabhavikānaṁ tesaṁ tattha ghānindriyañca na uppajjati jīvitindriyañca na uppajjissati. Yassa vā pana yattha jīvitindriyaṁ na uppajjissati tassa tattha ghānindriyaṁ na uppajjatīti? Pacchimabhavikānaṁ kāmāvacaraṁ upapajjantānaṁ tesaṁ tattha jīvitindriyaṁ na uppajjissati, no ca tesaṁ tattha ghānindriyaṁ na uppajjati. Kāmāvacare parinibbantānaṁ rūpāvacare arūpāvacare pacchimabhavikānaṁ tesaṁ tattha jīvitindriyañca na uppajjissati ghānindriyañca na uppajjati. Yassa yattha ghānindriyaṁ na uppajjati tassa tattha somanassindriyaṁ na uppajjissatīti? Kāmāvacarā cavantānaṁ aghānakānaṁ kāmāvacaraṁ upapajjantānaṁ rūpāvacarānaṁ tesaṁ tattha ghānindriyaṁ na uppajjati, no ca tesaṁ tattha somanassindriyaṁ na uppajjissati. Kāmāvacare parinibbantānaṁ rūpāvacare pacchimabhavikānaṁ asaññasattānaṁ arūpānaṁ ye ca upekkhāya upapajjitvā parinibbāyissanti tesaṁ cavantānaṁ tesaṁ tattha ghānindriyañca na uppajjati somanassindriyañca na uppajjissati. Yassa vā pana yattha somanassindriyaṁ na uppajjissati tassa tattha ghānindriyaṁ na uppajjatīti?