Yassa yattha somanassindriyaṁ uppajjati tassa tattha paññindriyaṁ uppajjatīti? Somanassena ñāṇavippayuttānaṁ upapajjantānaṁ pavatte somanassasampayuttañāṇavippayuttacittassa uppādakkhaṇe tesaṁ tattha somanassindriyaṁ uppajjati, no ca tesaṁ tattha paññindriyaṁ uppajjati. Somanassena ñāṇasampayuttānaṁ upapajjantānaṁ pavatte somanassasampayuttañāṇasampayuttacittassa uppādakkhaṇe tesaṁ tattha somanassindriyañca uppajjati paññindriyañca uppajjati. Yassa vā pana yattha paññindriyaṁ uppajjati tassa tattha somanassindriyaṁ uppajjatīti? Ñāṇasampayuttānaṁ vinā somanassena upapajjantānaṁ pavatte ñāṇasampayuttasomanassavippayuttacittassa uppādakkhaṇe tesaṁ tattha paññindriyaṁ uppajjati, no ca tesaṁ tattha somanassindriyaṁ uppajjati. Ñāṇasampayuttānaṁ somanassena upapajjantānaṁ pavatte ñāṇasampayuttasomanassasampayuttacittassa uppādakkhaṇe tesaṁ tattha paññindriyañca uppajjati somanassindriyañca uppajjati. Yassa yattha somanassindriyaṁ uppajjati tassa tattha manindriyaṁ uppajjatīti? Āmantā. Yassa vā pana yattha manindriyaṁ uppajjati tassa tattha somanassindriyaṁ uppajjatīti?