Yassa yattha ghānindriyaṁ na uppajjittha tassa tattha saddhindriyaṁ …pe… paññindriyaṁ …pe… manindriyaṁ na uppajjissatīti? Rūpāvacarānaṁ arūpāvacarānaṁ tesaṁ tattha ghānindriyaṁ na uppajjittha, no ca tesaṁ tattha manindriyaṁ na uppajjissati. Rūpāvacare arūpāvacare pacchimabhavikānaṁ asaññasattānaṁ tesaṁ tattha ghānindriyañca na uppajjittha manindriyañca na uppajjissati. Yassa vā pana yattha manindriyaṁ na uppajjissati tassa tattha ghānindriyaṁ na uppajjitthāti? Kāmāvacare pacchimabhavikānaṁ tesaṁ tattha manindriyaṁ na uppajjissati, no ca tesaṁ tattha ghānindriyaṁ na uppajjittha. Rūpāvacare arūpāvacare pacchimabhavikānaṁ asaññasattānaṁ tesaṁ tattha manindriyañca na uppajjissati ghānindriyañca na uppajjittha. (Ghānindriyamūlakaṁ.) Yassa yattha itthindriyaṁ na uppajjittha tassa tattha purisindriyaṁ na uppajjissatīti? Āmantā. Yassa vā pana yattha purisindriyaṁ na uppajjissati tassa tattha itthindriyaṁ na uppajjitthāti?