Aggamaggassa bhaṅgakkhaṇe arahantānaṁ asaññasattānaṁ tesaṁ tattha kusalā dhammā na nirujjhissanti, no ca tesaṁ tattha abyākatā dhammā na nirujjhissanti. Pacchimacittassa bhaṅgakkhaṇe tesaṁ tattha kusalā ca dhammā na nirujjhissanti abyākatā ca dhammā na nirujjhissanti. Yassa vā pana yattha abyākatā dhammā na nirujjhissanti tassa tattha kusalā dhammā na nirujjhissantīti? Āmantā. Yassa yattha akusalā dhammā na nirujjhissanti tassa tattha abyākatā dhammā na nirujjhissantīti? Aggamaggasamaṅgīnaṁ arahantānaṁ yassa cittassa anantarā aggamaggaṁ paṭilabhissanti asaññasattānaṁ tesaṁ tattha akusalā dhammā na nirujjhissanti, no ca tesaṁ tattha abyākatā dhammā na nirujjhissanti. Pacchimacittassa bhaṅgakkhaṇe tesaṁ tattha akusalā ca dhammā na nirujjhissanti abyākatā ca dhammā na nirujjhissanti. Yassa vā pana yattha abyākatā dhammā na nirujjhissanti tassa tattha akusalā dhammā na nirujjhissantīti? Āmantā. 9.2.2.4. Paccuppannātītavāra 9.2.2.4.1. Anulomapuggala Yassa kusalā dhammā nirujjhanti tassa akusalā dhammā nirujjhitthāti? Āmantā. Yassa vā pana akusalā dhammā nirujjhittha tassa kusalā dhammā nirujjhantīti? Sabbesaṁ cittassa uppādakkhaṇe kusalavippayuttacittassa bhaṅgakkhaṇe nirodhasamāpannānaṁ asaññasattānaṁ tesaṁ akusalā dhammā nirujjhittha, no ca tesaṁ kusalā dhammā nirujjhanti. Kusalānaṁ bhaṅgakkhaṇe tesaṁ akusalā ca dhammā nirujjhittha kusalā ca dhammā nirujjhanti. Yassa kusalā dhammā nirujjhanti tassa abyākatā dhammā nirujjhitthāti? Āmantā.