Ye rūpāvacaraṁ arūpāvacaraṁ upapajjitvā parinibbāyissanti tesaṁ ghānindriyaṁ na uppajjissati, no ca tesaṁ manindriyaṁ na uppajjissati. Pacchimabhavikānaṁ tesaṁ ghānindriyañca na uppajjissati manindriyañca na uppajjissati. Yassa vā pana manindriyaṁ na uppajjissati tassa ghānindriyaṁ na uppajjissatīti? Āmantā. (Ghānindriyamūlakaṁ.) Yassa itthindriyaṁ na uppajjissati tassa purisindriyaṁ na uppajjissatīti? Ye purisā eteneva bhāvena katici bhave dassetvā parinibbāyissanti tesaṁ itthindriyaṁ na uppajjissati, no ca tesaṁ purisindriyaṁ na uppajjissati. Pacchimabhavikānaṁ ye ca rūpāvacaraṁ arūpāvacaraṁ upapajjitvā parinibbāyissanti tesaṁ itthindriyañca na uppajjissati purisindriyañca na uppajjissati. Yassa vā pana purisindriyaṁ na uppajjissati tassa itthindriyaṁ na uppajjissatīti? Yā itthiyo eteneva bhāvena katici bhave dassetvā parinibbāyissanti tāsaṁ purisindriyaṁ na uppajjissati, no ca tāsaṁ itthindriyaṁ na uppajjissati. Pacchimabhavikānaṁ ye ca rūpāvacaraṁ arūpāvacaraṁ upapajjitvā parinibbāyissanti tesaṁ purisindriyañca na uppajjissati itthindriyañca na uppajjissati. Yassa itthindriyaṁ na uppajjissati tassa jīvitindriyaṁ na uppajjissatīti?