Yassa jīvitindriyaṁ na uppajjati tassa upekkhindriyaṁ na uppajjatīti? Āmantā. Yassa vā pana upekkhindriyaṁ na uppajjati tassa jīvitindriyaṁ na uppajjatīti? Vinā upekkhāya upapajjantānaṁ pavatte upekkhāvippayuttacittassa uppādakkhaṇe tesaṁ upekkhindriyaṁ na uppajjati, no ca tesaṁ jīvitindriyaṁ na uppajjati. Sabbesaṁ cavantānaṁ pavatte cittassa bhaṅgakkhaṇe tesaṁ upekkhindriyañca na uppajjati jīvitindriyañca na uppajjati. Yassa jīvitindriyaṁ na uppajjati tassa saddhindriyaṁ na uppajjatīti? Āmantā. Yassa vā pana saddhindriyaṁ na uppajjati tassa jīvitindriyaṁ na uppajjatīti? Ahetukānaṁ upapajjantānaṁ pavatte saddhāvippayuttacittassa uppādakkhaṇe tesaṁ saddhindriyaṁ na uppajjati, no ca tesaṁ jīvitindriyaṁ na uppajjati. Sabbesaṁ cavantānaṁ pavatte cittassa bhaṅgakkhaṇe tesaṁ saddhindriyañca na uppajjati jīvitindriyañca na uppajjati. Yassa jīvitindriyaṁ na uppajjati tassa paññindriyaṁ na uppajjatīti? Āmantā. Yassa vā pana paññindriyaṁ na uppajjati tassa jīvitindriyaṁ na uppajjatīti? Ñāṇavippayuttānaṁ upapajjantānaṁ pavatte ñāṇavippayuttacittassa uppādakkhaṇe tesaṁ paññindriyaṁ na uppajjati, no ca tesaṁ jīvitindriyaṁ na uppajjati. Sabbesaṁ cavantānaṁ pavatte cittassa bhaṅgakkhaṇe tesaṁ paññindriyañca na uppajjati jīvitindriyañca na uppajjati.