Yassa vā pana cittaṁ nirujjhamānaṁ khaṇaṁ khaṇaṁ vītikkantaṁ atikkantakālaṁ, uppajjamānaṁ khaṇaṁ khaṇaṁ vītikkantaṁ atikkantakālaṁ tassa cittanti? Atītaṁ cittaṁ. Yassa cittaṁ na uppajjamānaṁ khaṇaṁ khaṇaṁ vītikkantaṁ atikkantakālaṁ, na nirujjhamānaṁ khaṇaṁ khaṇaṁ vītikkantaṁ atikkantakālaṁ tassa cittanti? Uppādakkhaṇe anāgataṁ cittaṁ. Yassa vā pana cittaṁ na nirujjhamānaṁ khaṇaṁ khaṇaṁ vītikkantaṁ atikkantakālaṁ, na uppajjamānaṁ khaṇaṁ khaṇaṁ vītikkantaṁ atikkantakālaṁ tassa cittanti? Bhaṅgakkhaṇe cittaṁ bhaṅgakkhaṇaṁ avītikkantaṁ no ca uppādakkhaṇaṁ avītikkantaṁ, uppādakkhaṇe anāgatañca cittaṁ bhaṅgakkhaṇañca avītikkantaṁ uppādakkhaṇañca avītikkantaṁ. 8.2.1.2. Dhammavāra 8.2.1.2.1. Uppādanirodhakālasambhedavāra Yaṁ cittaṁ uppajjati na nirujjhati taṁ cittaṁ nirujjhissati na uppajjissatīti? Āmantā. Yaṁ vā pana cittaṁ nirujjhissati na uppajjissati taṁ cittaṁ uppajjati na nirujjhatīti? Āmantā. Yaṁ cittaṁ na uppajjati nirujjhati taṁ cittaṁ na nirujjhissati uppajjissatīti? No. Yaṁ vā pana cittaṁ na nirujjhissati uppajjissati taṁ cittaṁ na uppajjati nirujjhatīti? Natthi. 8.2.1.2.2. Uppāduppannavāra Yaṁ cittaṁ uppajjati taṁ cittaṁ uppannanti? Āmantā. Yaṁ vā pana cittaṁ uppannaṁ taṁ cittaṁ uppajjatīti? Bhaṅgakkhaṇe cittaṁ uppannaṁ, no ca taṁ cittaṁ uppajjati. Uppādakkhaṇe cittaṁ uppannañceva uppajjati ca.