Yassa yattha saddhindriyaṁ na uppajjati tassa tattha paññindriyaṁ …pe… manindriyaṁ na uppajjissatīti? Sabbesaṁ cittassa bhaṅgakkhaṇe saddhāvippayuttacittassa uppādakkhaṇe tesaṁ tattha saddhindriyaṁ na uppajjati, no ca tesaṁ tattha manindriyaṁ na uppajjissati. Pacchimacittassa bhaṅgakkhaṇe asaññasattānaṁ tesaṁ tattha saddhindriyañca na uppajjati manindriyañca na uppajjissati. Yassa vā pana yattha manindriyaṁ na uppajjissati tassa tattha saddhindriyaṁ na uppajjatīti? Pacchimacittassa uppādakkhaṇe tesaṁ tattha manindriyaṁ na uppajjissati, no ca tesaṁ tattha saddhindriyaṁ na uppajjati. Pacchimacittassa bhaṅgakkhaṇe asaññasattānaṁ tesaṁ tattha manindriyañca na uppajjissati saddhindriyañca na uppajjati. (Saddhindriyamūlakaṁ.) Yassa yattha paññindriyaṁ na uppajjati tassa tattha manindriyaṁ na uppajjissatīti? Sabbesaṁ cittassa bhaṅgakkhaṇe ñāṇavippayuttacittassa uppādakkhaṇe tesaṁ tattha paññindriyaṁ na uppajjati, no ca tesaṁ tattha manindriyaṁ na uppajjissati. Pacchimacittassa bhaṅgakkhaṇe asaññasattānaṁ tesaṁ tattha paññindriyañca na uppajjati manindriyañca na uppajjissati. Yassa vā pana yattha manindriyaṁ na uppajjissati tassa tattha paññindriyaṁ na uppajjatīti?