Pacchimacittasamaṅgīnaṁ tesaṁ tattha kusalā dhammā uppajjittha, no ca tesaṁ tattha abyākatā dhammā uppajjissanti. Itaresaṁ catuvokārānaṁ pañcavokārānaṁ tesaṁ tattha kusalā ca dhammā uppajjittha abyākatā ca dhammā uppajjissanti. Yassa vā pana yattha abyākatā dhammā uppajjissanti tassa tattha kusalā dhammā uppajjitthāti? Suddhāvāsānaṁ dutiye citte vattamāne asaññasattānaṁ tesaṁ tattha abyākatā dhammā uppajjissanti, no ca tesaṁ tattha kusalā dhammā uppajjittha. Itaresaṁ catuvokārānaṁ pañcavokārānaṁ tesaṁ tattha abyākatā ca dhammā uppajjissanti kusalā ca dhammā uppajjittha. Yassa yattha akusalā dhammā uppajjittha tassa tattha abyākatā dhammā uppajjissantīti? Pacchimacittasamaṅgīnaṁ tesaṁ tattha akusalā dhammā uppajjittha, no ca tesaṁ tattha abyākatā dhammā uppajjissanti. Itaresaṁ catuvokārānaṁ pañcavokārānaṁ tesaṁ tattha akusalā ca dhammā uppajjittha abyākatā ca dhammā uppajjissanti. Yassa vā pana yattha abyākatā dhammā uppajjissanti tassa tattha akusalā dhammā uppajjitthāti? Suddhāvāsānaṁ dutiye citte vattamāne asaññasattānaṁ tesaṁ tattha abyākatā dhammā uppajjissanti, no ca tesaṁ tattha akusalā dhammā uppajjittha. Itaresaṁ catuvokārānaṁ pañcavokārānaṁ tesaṁ tattha abyākatā ca dhammā uppajjissanti akusalā ca dhammā uppajjittha. 9.2.1.6.4. Paccanīkapuggala Yassa kusalā dhammā na uppajjittha tassa akusalā dhammā na uppajjissantīti? Natthi.