Aggamaggasamaṅgīnaṁ arahantānaṁ yassa cittassa anantarā aggamaggaṁ paṭilabhissanti asaññasattānaṁ tesaṁ tattha akusalā dhammā na uppajjissanti, no ca tesaṁ tattha abyākatā dhammā na nirujjhissanti. Pacchimacittassa bhaṅgakkhaṇe tesaṁ tattha akusalā ca dhammā na uppajjissanti abyākatā ca dhammā na nirujjhissanti. Yassa vā pana yattha abyākatā dhammā na nirujjhissanti tassa tattha akusalā dhammā na uppajjissantīti? Āmantā. 9.2.3.4. Paccuppannātītavāra 9.2.3.4.1. Anulomapuggala Yassa kusalā dhammā uppajjanti tassa akusalā dhammā nirujjhitthāti? Āmantā. Yassa vā pana akusalā dhammā nirujjhittha tassa kusalā dhammā uppajjantīti? Sabbesaṁ cittassa bhaṅgakkhaṇe kusalavippayuttacittassa uppādakkhaṇe nirodhasamāpannānaṁ asaññasattānaṁ tesaṁ akusalā dhammā nirujjhittha, no ca tesaṁ kusalā dhammā uppajjanti. Kusalānaṁ uppādakkhaṇe tesaṁ akusalā ca dhammā nirujjhittha kusalā ca dhammā uppajjanti. Yassa kusalā dhammā uppajjanti tassa abyākatā dhammā nirujjhitthāti? Āmantā. Yassa vā pana abyākatā dhammā nirujjhittha tassa kusalā dhammā uppajjantīti? Sabbesaṁ cittassa bhaṅgakkhaṇe kusalavippayuttacittassa uppādakkhaṇe nirodhasamāpannānaṁ asaññasattānaṁ tesaṁ abyākatā dhammā nirujjhittha, no ca tesaṁ kusalā dhammā uppajjanti. Kusalānaṁ uppādakkhaṇe tesaṁ abyākatā ca dhammā nirujjhittha kusalā ca dhammā uppajjanti.