Vinā upekkhāya upapajjantānaṁ pavatte upekkhāvippayuttacittassa uppādakkhaṇe tesaṁ tattha upekkhindriyaṁ na uppajjati, no ca tesaṁ tattha jīvitindriyaṁ na uppajjati. Sabbesaṁ cavantānaṁ pavatte cittassa bhaṅgakkhaṇe tesaṁ tattha upekkhindriyañca na uppajjati jīvitindriyañca na uppajjati. Yassa yattha jīvitindriyaṁ na uppajjati tassa tattha saddhindriyaṁ na uppajjatīti? Āmantā. Yassa vā pana yattha saddhindriyaṁ na uppajjati tassa tattha jīvitindriyaṁ na uppajjatīti? Ahetukānaṁ upapajjantānaṁ pavatte saddhāvippayuttacittassa uppādakkhaṇe tesaṁ tattha saddhindriyaṁ na uppajjati, no ca tesaṁ tattha jīvitindriyaṁ na uppajjati. Sabbesaṁ cavantānaṁ pavatte cittassa bhaṅgakkhaṇe tesaṁ tattha saddhindriyañca na uppajjati jīvitindriyañca na uppajjati. Yassa yattha jīvitindriyaṁ na uppajjati tassa tattha paññindriyaṁ na uppajjatīti? Āmantā. Yassa vā pana yattha paññindriyaṁ na uppajjati tassa tattha jīvitindriyaṁ na uppajjatīti? Ñāṇavippayuttānaṁ upapajjantānaṁ pavatte ñāṇavippayuttacittassa uppādakkhaṇe tesaṁ tattha paññindriyaṁ na uppajjati, no ca tesaṁ tattha jīvitindriyaṁ na uppajjati. Sabbesaṁ cavantānaṁ pavatte cittassa bhaṅgakkhaṇe tesaṁ tattha paññindriyañca na uppajjati jīvitindriyañca na uppajjati.