Yaṁ cittaṁ na uppajjati taṁ cittaṁ na uppannanti? Bhaṅgakkhaṇe cittaṁ na uppajjati, no ca taṁ cittaṁ na uppannaṁ. Atītānāgataṁ cittaṁ na ceva uppajjati na ca uppannaṁ. Yaṁ vā pana cittaṁ na uppannaṁ taṁ cittaṁ na uppajjatīti? Āmantā. 8.2.1.2.3. Nirodhuppannavāra Yaṁ cittaṁ nirujjhati taṁ cittaṁ uppannanti? Āmantā. Yaṁ vā pana cittaṁ uppannaṁ taṁ cittaṁ nirujjhatīti? Uppādakkhaṇe cittaṁ uppannaṁ, no ca taṁ cittaṁ nirujjhati. Bhaṅgakkhaṇe cittaṁ uppannañceva nirujjhati ca. Yaṁ cittaṁ na nirujjhati taṁ cittaṁ na uppannanti? Uppādakkhaṇe cittaṁ na nirujjhati, no ca taṁ cittaṁ na uppannaṁ. Atītānāgataṁ cittaṁ na ceva nirujjhati na ca uppannaṁ. Yaṁ vā pana cittaṁ na uppannaṁ taṁ cittaṁ na nirujjhatīti? Āmantā. 8.2.1.2.4. Uppādavāra Yaṁ cittaṁ uppajjati taṁ cittaṁ uppajjitthāti? No. Yaṁ vā pana cittaṁ uppajjittha taṁ cittaṁ uppajjatīti? No. Yaṁ cittaṁ na uppajjati taṁ cittaṁ na uppajjitthāti? Atītaṁ cittaṁ na uppajjati, no ca taṁ cittaṁ na uppajjittha. Bhaṅgakkhaṇe anāgatañca cittaṁ na ceva uppajjati na ca uppajjittha. Yaṁ vā pana cittaṁ na uppajjittha taṁ cittaṁ na uppajjatīti? Uppādakkhaṇe cittaṁ na uppajjittha, no ca taṁ cittaṁ na uppajjati. Bhaṅgakkhaṇe anāgatañca cittaṁ na ceva uppajjittha na ca uppajjati. Yaṁ cittaṁ uppajjati taṁ cittaṁ uppajjissatīti? No. Yaṁ vā pana cittaṁ uppajjissati taṁ cittaṁ uppajjatīti? No.