Yassa yattha purisindriyaṁ na uppajjati tassa tattha saddhindriyaṁ …pe… paññindriyaṁ …pe… manindriyaṁ na uppajjissatīti? Kāmāvacarā cavantānaṁ na purisānaṁ kāmāvacaraṁ upapajjantānaṁ rūpāvacarānaṁ arūpāvacarānaṁ tesaṁ tattha purisindriyaṁ na uppajjati, no ca tesaṁ tattha manindriyaṁ na uppajjissati. Kāmāvacare parinibbantānaṁ rūpāvacare arūpāvacare pacchimabhavikānaṁ asaññasattānaṁ tesaṁ tattha purisindriyañca na uppajjati manindriyañca na uppajjissati. Yassa vā pana yattha manindriyaṁ na uppajjissati tassa tattha purisindriyaṁ na uppajjatīti? Pacchimabhavikānaṁ purisānaṁ upapajjantānaṁ tesaṁ tattha manindriyaṁ na uppajjissati, no ca tesaṁ tattha purisindriyaṁ na uppajjati. Kāmāvacare parinibbantānaṁ rūpāvacare arūpāvacare pacchimabhavikānaṁ asaññasattānaṁ tesaṁ tattha manindriyañca na uppajjissati purisindriyañca na uppajjati. (Purisindriyamūlakaṁ.) Yassa yattha jīvitindriyaṁ na uppajjati tassa tattha somanassindriyaṁ na uppajjissatīti?