Yassa vā pana manindriyaṁ uppajjittha tassa saddhindriyaṁ uppajjatīti? Sabbesaṁ cittassa bhaṅgakkhaṇe saddhāvippayuttacittassa uppādakkhaṇe nirodhasamāpannānaṁ asaññasattānaṁ tesaṁ manindriyaṁ uppajjittha, no ca tesaṁ saddhindriyaṁ uppajjati. Sahetukānaṁ upapajjantānaṁ pavatte saddhāsampayuttacittassa uppādakkhaṇe tesaṁ manindriyañca uppajjittha saddhindriyañca uppajjati. (Saddhindriyamūlakaṁ.) Yassa paññindriyaṁ uppajjati tassa manindriyaṁ uppajjitthāti? Āmantā. Yassa vā pana manindriyaṁ uppajjittha tassa paññindriyaṁ uppajjatīti? Sabbesaṁ cittassa bhaṅgakkhaṇe ñāṇavippayuttacittassa uppādakkhaṇe nirodhasamāpannānaṁ asaññasattānaṁ tesaṁ manindriyaṁ uppajjittha, no ca tesaṁ paññindriyaṁ uppajjati. Ñāṇasampayuttānaṁ upapajjantānaṁ pavatte ñāṇasampayuttacittassa uppādakkhaṇe tesaṁ manindriyañca uppajjittha paññindriyañca uppajjati. (Paññindriyamūlakaṁ.) 10.2.1.4.2. Anulomaokāsa Yattha cakkhundriyaṁ uppajjati tattha sotindriyaṁ uppajjitthāti? …pe…. 10.2.1.4.3. Anulomapuggalokāsa Yassa yattha cakkhundriyaṁ uppajjati tassa tattha sotindriyaṁ uppajjitthāti? Suddhāvāsaṁ upapajjantānaṁ tesaṁ tattha cakkhundriyaṁ uppajjati, no ca tesaṁ tattha sotindriyaṁ uppajjittha. Itaresaṁ sacakkhukānaṁ upapajjantānaṁ tesaṁ tattha cakkhundriyañca uppajjati sotindriyañca uppajjittha.