Pañcavokāre pacchimabhavikānaṁ ye ca sacakkhukā somanassena upapajjitvā parinibbāyissanti tesaṁ tattha upekkhindriyaṁ na uppajjissati, no ca tesaṁ tattha cakkhundriyaṁ na uppajjittha. Suddhāvāsānaṁ arūpe pacchimabhavikānaṁ asaññasattānaṁ tesaṁ tattha upekkhindriyañca na uppajjissati cakkhundriyañca na uppajjittha. Yassa yattha cakkhundriyaṁ na uppajjittha tassa tattha saddhindriyaṁ …pe… paññindriyaṁ …pe… manindriyaṁ na uppajjissatīti? Arūpānaṁ tesaṁ tattha cakkhundriyaṁ na uppajjittha, no ca tesaṁ tattha manindriyaṁ na uppajjissati. Suddhāvāsānaṁ arūpe pacchimabhavikānaṁ asaññasattānaṁ tesaṁ tattha cakkhundriyañca na uppajjittha manindriyañca na uppajjissati. Yassa vā pana yattha manindriyaṁ na uppajjissati tassa tattha cakkhundriyaṁ na uppajjitthāti?
