Yassa vā pana manindriyaṁ uppajjati tassa ghānindriyaṁ uppajjatīti? Sacittakānaṁ aghānakānaṁ upapajjantānaṁ tesaṁ manindriyaṁ uppajjati, no ca tesaṁ ghānindriyaṁ uppajjati. Saghānakānaṁ upapajjantānaṁ tesaṁ manindriyañca uppajjati ghānindriyañca uppajjati. (Ghānindriyamūlakaṁ.) Yassa itthindriyaṁ uppajjati tassa purisindriyaṁ uppajjatīti? No. Yassa vā pana purisindriyaṁ uppajjati tassa itthindriyaṁ uppajjatīti? No. Yassa itthindriyaṁ uppajjati tassa jīvitindriyaṁ uppajjatīti? Āmantā. Yassa vā pana jīvitindriyaṁ uppajjati tassa itthindriyaṁ uppajjatīti? Na itthīnaṁ upapajjantānaṁ tesaṁ jīvitindriyaṁ uppajjati, no ca tesaṁ itthindriyaṁ uppajjati. Itthīnaṁ upapajjantīnaṁ tāsaṁ jīvitindriyañca uppajjati itthindriyañca uppajjati. Yassa itthindriyaṁ uppajjati tassa somanassindriyaṁ uppajjatīti? Itthīnaṁ vinā somanassena upapajjantīnaṁ tāsaṁ itthindriyaṁ uppajjati, no ca tāsaṁ somanassindriyaṁ uppajjati. Itthīnaṁ somanassena upapajjantīnaṁ tāsaṁ itthindriyañca uppajjati somanassindriyañca uppajjati. Yassa vā pana somanassindriyaṁ uppajjati tassa itthindriyaṁ uppajjatīti? Somanassena na itthīnaṁ upapajjantānaṁ tesaṁ somanassindriyaṁ uppajjati, no ca tesaṁ itthindriyaṁ uppajjati. Somanassena itthīnaṁ upapajjantīnaṁ tāsaṁ somanassindriyañca uppajjati itthindriyañca uppajjati.