Pacchimabhavikānaṁ ye ca somanassena upapajjitvā parinibbāyissanti tesaṁ ghānindriyaṁ uppajjittha, no ca tesaṁ upekkhindriyaṁ uppajjissati. Itaresaṁ tesaṁ ghānindriyañca uppajjittha upekkhindriyañca uppajjissati. Yassa vā pana upekkhindriyaṁ uppajjissati tassa ghānindriyaṁ uppajjitthāti? Āmantā. Yassa ghānindriyaṁ uppajjittha tassa saddhindriyaṁ …pe… paññindriyaṁ …pe… manindriyaṁ uppajjissatīti? Pacchimabhavikānaṁ tesaṁ ghānindriyaṁ uppajjittha, no ca tesaṁ manindriyaṁ uppajjissati. Itaresaṁ tesaṁ ghānindriyañca uppajjittha manindriyañca uppajjissati. Yassa vā pana manindriyaṁ uppajjissati tassa ghānindriyaṁ uppajjitthāti? Āmantā. (Ghānindriyamūlakaṁ.) Yassa itthindriyaṁ uppajjittha tassa purisindriyaṁ uppajjissatīti? Pacchimabhavikānaṁ ye ca rūpāvacaraṁ arūpāvacaraṁ upapajjitvā parinibbāyissanti yā ca itthiyo eteneva bhāvena katici bhave dassetvā parinibbāyissanti tesaṁ itthindriyaṁ uppajjittha, no ca tesaṁ purisindriyaṁ uppajjissati. Itaresaṁ tesaṁ itthindriyañca uppajjittha purisindriyañca uppajjissati. Yassa vā pana purisindriyaṁ uppajjissati tassa itthindriyaṁ uppajjitthāti? Āmantā. Yassa itthindriyaṁ uppajjittha tassa jīvitindriyaṁ uppajjissatīti? Pacchimabhavikānaṁ tesaṁ itthindriyaṁ uppajjittha, no ca tesaṁ jīvitindriyaṁ uppajjissati. Itaresaṁ tesaṁ itthindriyañca uppajjittha jīvitindriyañca uppajjissati.