Vinā somanassena ñāṇasampayuttānaṁ upapajjantānaṁ pavatte somanassavippayuttañāṇasampayuttacittassa uppādakkhaṇe tesaṁ tattha somanassindriyaṁ na uppajjati, no ca tesaṁ tattha paññindriyaṁ na uppajjati. Sabbesaṁ cittassa bhaṅgakkhaṇe somanassavippayuttañāṇavippayuttacittassa uppādakkhaṇe asaññasattānaṁ tesaṁ tattha somanassindriyañca na uppajjati paññindriyañca na uppajjati. Yassa vā pana yattha paññindriyaṁ na uppajjati tassa tattha somanassindriyaṁ na uppajjatīti? Ñāṇavippayuttānaṁ somanassena upapajjantānaṁ pavatte ñāṇavippayuttasomanassasampayuttacittassa uppādakkhaṇe tesaṁ tattha paññindriyaṁ na uppajjati, no ca tesaṁ tattha somanassindriyaṁ na uppajjati. Sabbesaṁ cittassa bhaṅgakkhaṇe ñāṇavippayuttasomanassavippayuttacittassa uppādakkhaṇe asaññasattānaṁ tesaṁ tattha paññindriyañca na uppajjati somanassindriyañca na uppajjati. Yassa yattha somanassindriyaṁ na uppajjati tassa tattha manindriyaṁ na uppajjatīti? Vinā somanassena sacittakānaṁ upapajjantānaṁ pavatte somanassavippayuttacittassa uppādakkhaṇe tesaṁ tattha somanassindriyaṁ na uppajjati, no ca tesaṁ tattha manindriyaṁ na uppajjati. Sabbesaṁ cittassa bhaṅgakkhaṇe asaññasattānaṁ tesaṁ tattha somanassindriyañca na uppajjati manindriyañca na uppajjati. Yassa vā pana yattha manindriyaṁ na uppajjati tassa tattha somanassindriyaṁ na uppajjatīti? Āmantā. (Somanassindriyamūlakaṁ.) Yassa yattha upekkhindriyaṁ na uppajjati tassa tattha saddhindriyaṁ na uppajjatīti?