Pacchimabhavikānaṁ kāmāvacaraṁ upapajjantānaṁ rūpāvacaraṁ upapajjantānaṁ ye ca purisā eteneva bhāvena katici bhave dassetvā parinibbāyissanti tesaṁ upapajjantānaṁ tesaṁ tattha itthindriyaṁ na uppajjissati, no ca tesaṁ tattha cakkhundriyaṁ na uppajjati. Kāmāvacare parinibbantānaṁ rūpāvacarā cavantānaṁ asaññasattānaṁ arūpānaṁ ye ca purisā eteneva bhāvena katici bhave dassetvā parinibbāyissanti tesaṁ cavantānaṁ tesaṁ tattha itthindriyañca na uppajjissati cakkhundriyañca na uppajjati. Yassa yattha cakkhundriyaṁ na uppajjati tassa tattha purisindriyaṁ na uppajjissatīti? Kāmāvacarā cavantānaṁ acakkhukānaṁ kāmāvacaraṁ upapajjantānaṁ tesaṁ tattha cakkhundriyaṁ na uppajjati, no ca tesaṁ tattha purisindriyaṁ na uppajjissati. Kāmāvacare parinibbantānaṁ rūpāvacarā cavantānaṁ asaññasattānaṁ arūpānaṁ yā ca itthiyo eteneva bhāvena katici bhave dassetvā parinibbāyissanti tāsaṁ cavantīnaṁ tesaṁ tattha cakkhundriyañca na uppajjati purisindriyañca na uppajjissati. Yassa vā pana yattha purisindriyaṁ na uppajjissati tassa tattha cakkhundriyaṁ na uppajjatīti?