Pacchimacittassa uppādakkhaṇe yassa cittassa anantarā upekkhāsampayuttapacchimacittaṁ uppajjissati tassa cittassa uppādakkhaṇe tesaṁ somanassindriyaṁ na uppajjissati, no ca tesaṁ jīvitindriyaṁ na uppajjati. Pacchimacittassa bhaṅgakkhaṇe yassa cittassa anantarā upekkhāsampayuttapacchimacittaṁ uppajjissati tassa cittassa bhaṅgakkhaṇe tesaṁ somanassindriyañca na uppajjissati jīvitindriyañca na uppajjati. Yassa jīvitindriyaṁ na uppajjati tassa upekkhindriyaṁ na uppajjissatīti? Sabbesaṁ cavantānaṁ pavatte cittassa bhaṅgakkhaṇe tesaṁ jīvitindriyaṁ na uppajjati, no ca tesaṁ upekkhindriyaṁ na uppajjissati. Pacchimacittassa bhaṅgakkhaṇe yassa cittassa anantarā somanassasampayuttapacchimacittaṁ uppajjissati tassa cittassa bhaṅgakkhaṇe tesaṁ jīvitindriyañca na uppajjati upekkhindriyañca na uppajjissati. Yassa vā pana upekkhindriyaṁ na uppajjissati tassa jīvitindriyaṁ na uppajjatīti? Pacchimacittassa uppādakkhaṇe yassa cittassa anantarā somanassasampayuttapacchimacittaṁ uppajjissati tassa cittassa uppādakkhaṇe tesaṁ upekkhindriyaṁ na uppajjissati, no ca tesaṁ jīvitindriyaṁ na uppajjati. Pacchimacittassa bhaṅgakkhaṇe yassa cittassa anantarā somanassasampayuttapacchimacittaṁ uppajjissati tassa cittassa bhaṅgakkhaṇe tesaṁ upekkhindriyañca na uppajjissati jīvitindriyañca na uppajjati.