Yaṁ cittaṁ na uppajjittha no ca taṁ cittaṁ na uppannaṁ, taṁ cittaṁ na uppajjissatīti? Āmantā. Yaṁ vā pana cittaṁ na uppajjissati no ca taṁ cittaṁ na uppannaṁ, taṁ cittaṁ na uppajjitthāti? Āmantā. 8.2.1.2.12. Uppannuppajjamānavāra Uppannaṁ uppajjamānanti? Bhaṅgakkhaṇe uppannaṁ, no ca uppajjamānaṁ. Uppādakkhaṇe uppannañceva uppajjamānañca. Uppajjamānaṁ uppannanti? Āmantā. Na uppannaṁ na uppajjamānanti? Āmantā. Na uppajjamānaṁ na uppannanti? Bhaṅgakkhaṇe na uppajjamānaṁ, no ca na uppannaṁ. Atītānāgataṁ cittaṁ na ceva uppajjamānaṁ na ca uppannaṁ. 8.2.1.2.13. Niruddhanirujjhamānavāra Niruddhaṁ nirujjhamānanti? No. Nirujjhamānaṁ niruddhanti? No. Na niruddhaṁ na nirujjhamānanti? Bhaṅgakkhaṇe na niruddhaṁ, no ca na nirujjhamānaṁ. Uppādakkhaṇe anāgatañca cittaṁ na ceva niruddhaṁ na ca nirujjhamānaṁ. Na nirujjhamānaṁ na niruddhanti? Atītaṁ cittaṁ na nirujjhamānaṁ, no ca na niruddhaṁ. Uppādakkhaṇe anāgatañca cittaṁ na ceva nirujjhamānaṁ na ca niruddhaṁ. 8.2.1.2.14. Atikkantakālavāra Yaṁ cittaṁ uppajjamānaṁ khaṇaṁ khaṇaṁ vītikkantaṁ atikkantakālaṁ, nirujjhamānaṁ khaṇaṁ khaṇaṁ vītikkantaṁ atikkantakālaṁ taṁ cittanti? Bhaṅgakkhaṇe cittaṁ uppādakkhaṇaṁ vītikkantaṁ bhaṅgakkhaṇaṁ avītikkantaṁ, atītaṁ cittaṁ uppādakkhaṇañca vītikkantaṁ bhaṅgakkhaṇañca vītikkantaṁ.