Uppādakkhaṇe cittaṁ na nirujjhamānaṁ, no ca taṁ cittaṁ na uppannaṁ. Atītānāgataṁ cittaṁ na ceva nirujjhamānaṁ na ca uppannaṁ. Yaṁ vā pana cittaṁ na uppannaṁ taṁ cittaṁ na nirujjhamānanti? Āmantā. 8.2.1.2.10. Uppannuppādavāra Yaṁ cittaṁ uppannaṁ taṁ cittaṁ uppajjitthāti? No. Yaṁ vā pana cittaṁ uppajjittha taṁ cittaṁ uppannanti? No. Yaṁ cittaṁ na uppannaṁ taṁ cittaṁ na uppajjitthāti? Atītaṁ cittaṁ na uppannaṁ, no ca taṁ cittaṁ na uppajjittha. Anāgataṁ cittaṁ na ceva uppannaṁ na ca uppajjittha. Yaṁ vā pana cittaṁ na uppajjittha taṁ cittaṁ na uppannanti? Paccuppannaṁ cittaṁ na uppajjittha, no ca taṁ cittaṁ na uppannaṁ. Anāgataṁ cittaṁ na ceva uppajjittha na ca uppannaṁ. Yaṁ cittaṁ uppannaṁ taṁ cittaṁ uppajjissatīti? No. Yaṁ vā pana cittaṁ uppajjissati taṁ cittaṁ uppannanti? No. Yaṁ cittaṁ na uppannaṁ taṁ cittaṁ na uppajjissatīti? Anāgataṁ cittaṁ na uppannaṁ, no ca taṁ cittaṁ na uppajjissati. Atītaṁ cittaṁ na ceva uppannaṁ na ca uppajjissati. Yaṁ vā pana cittaṁ na uppajjissati taṁ cittaṁ na uppannanti? Paccuppannaṁ cittaṁ na uppajjissati, no ca taṁ cittaṁ na uppannaṁ. Atītaṁ cittaṁ na ceva uppajjissati na ca uppannaṁ. 8.2.1.2.11. Atītānāgatavāra Yaṁ cittaṁ uppajjittha no ca taṁ cittaṁ uppannaṁ, taṁ cittaṁ uppajjissatīti? No. Yaṁ vā pana cittaṁ uppajjissati no ca taṁ cittaṁ uppannaṁ, taṁ cittaṁ uppajjitthāti? No.