Yassa akusalā dhammā nirujjhittha tassa abyākatā dhammā nirujjhissantīti? Pacchimacittassa bhaṅgakkhaṇe tesaṁ akusalā dhammā nirujjhittha, no ca tesaṁ abyākatā dhammā nirujjhissanti. Itaresaṁ tesaṁ akusalā ca dhammā nirujjhittha abyākatā ca dhammā nirujjhissanti. Yassa vā pana abyākatā dhammā nirujjhissanti tassa akusalā dhammā nirujjhitthāti? Āmantā. 9.2.2.6.2. Anulomaokāsa Yattha kusalā dhammā nirujjhittha tattha akusalā dhammā nirujjhissantīti? …pe…. 9.2.2.6.3. Anulomapuggalokāsa Yassa yattha kusalā dhammā nirujjhittha tassa tattha akusalā dhammā nirujjhissantīti? Aggamaggasamaṅgīnaṁ arahantānaṁ yassa cittassa anantarā aggamaggaṁ paṭilabhissanti tesaṁ tattha kusalā dhammā nirujjhittha, no ca tesaṁ tattha akusalā dhammā nirujjhissanti. Itaresaṁ catuvokārānaṁ pañcavokārānaṁ tesaṁ tattha kusalā ca dhammā nirujjhittha akusalā ca dhammā nirujjhissanti. Yassa vā pana yattha akusalā dhammā nirujjhissanti tassa tattha kusalā dhammā nirujjhitthāti? Suddhāvāsānaṁ dutiye citte vattamāne tesaṁ tattha akusalā dhammā nirujjhissanti, no ca tesaṁ tattha kusalā dhammā nirujjhittha. Itaresaṁ catuvokārānaṁ pañcavokārānaṁ tesaṁ tattha akusalā ca dhammā nirujjhissanti kusalā ca dhammā nirujjhittha. Yassa yattha kusalā dhammā nirujjhittha tassa tattha abyākatā dhammā nirujjhissantīti?