Pañcavokāre pacchimabhavikānaṁ ye ca sacakkhukā upekkhāya upapajjitvā parinibbāyissanti tesaṁ tattha cakkhundriyaṁ uppajjittha, no ca tesaṁ tattha somanassindriyaṁ uppajjissati. Itaresaṁ pañcavokārānaṁ tesaṁ tattha cakkhundriyañca uppajjittha somanassindriyañca uppajjissati. Yassa vā pana yattha somanassindriyaṁ uppajjissati tassa tattha cakkhundriyaṁ uppajjitthāti? Āmantā. Yassa yattha cakkhundriyaṁ uppajjittha tassa tattha upekkhindriyaṁ uppajjissatīti? Pañcavokāre pacchimabhavikānaṁ ye ca sacakkhukā somanassena upapajjitvā parinibbāyissanti tesaṁ tattha cakkhundriyaṁ uppajjittha, no ca tesaṁ tattha upekkhindriyaṁ uppajjissati. Itaresaṁ pañcavokārānaṁ tesaṁ tattha cakkhundriyañca uppajjittha upekkhindriyañca uppajjissati. Yassa vā pana yattha upekkhindriyaṁ uppajjissati tassa tattha cakkhundriyaṁ uppajjitthāti? Arūpānaṁ tesaṁ tattha upekkhindriyaṁ uppajjissati, no ca tesaṁ tattha cakkhundriyaṁ uppajjittha. Pañcavokārānaṁ tesaṁ tattha upekkhindriyañca uppajjissati cakkhundriyañca uppajjittha.