Yassa vā pana jīvitindriyaṁ uppajjissati tassa itthindriyaṁ uppajjitthāti? Āmantā. Yassa itthindriyaṁ uppajjittha tassa somanassindriyaṁ uppajjissatīti? Pacchimabhavikānaṁ ye ca upekkhāya upapajjitvā parinibbāyissanti tesaṁ itthindriyaṁ uppajjittha, no ca tesaṁ somanassindriyaṁ uppajjissati. Itaresaṁ tesaṁ itthindriyañca uppajjittha somanassindriyañca uppajjissati. Yassa vā pana somanassindriyaṁ uppajjissati tassa itthindriyaṁ uppajjitthāti? Āmantā. Yassa itthindriyaṁ uppajjittha tassa upekkhindriyaṁ uppajjissatīti? Pacchimabhavikānaṁ ye ca somanassena upapajjitvā parinibbāyissanti tesaṁ itthindriyaṁ uppajjittha, no ca tesaṁ upekkhindriyaṁ uppajjissati. Itaresaṁ tesaṁ itthindriyañca uppajjittha upekkhindriyañca uppajjissati. Yassa vā pana upekkhindriyaṁ uppajjissati tassa itthindriyaṁ uppajjitthāti? Āmantā. Yassa itthindriyaṁ uppajjittha tassa saddhindriyaṁ …pe… paññindriyaṁ …pe… manindriyaṁ uppajjissatīti? Pacchimabhavikānaṁ tesaṁ itthindriyaṁ uppajjittha, no ca tesaṁ manindriyaṁ uppajjissati. Itaresaṁ tesaṁ itthindriyañca uppajjittha manindriyañca uppajjissati. Yassa vā pana manindriyaṁ uppajjissati tassa itthindriyaṁ uppajjitthāti? Āmantā. (Itthindriyamūlakaṁ.)