Upekkhāya ñāṇavippayuttānaṁ upapajjantānaṁ pavatte upekkhāsampayuttañāṇavippayuttacittassa uppādakkhaṇe tesaṁ tattha upekkhindriyaṁ uppajjati, no ca tesaṁ tattha paññindriyaṁ uppajjati. Upekkhāya ñāṇasampayuttānaṁ upapajjantānaṁ pavatte upekkhāsampayuttañāṇasampayuttacittassa uppādakkhaṇe tesaṁ tattha upekkhindriyañca uppajjati paññindriyañca uppajjati. Yassa vā pana yattha paññindriyaṁ uppajjati tassa tattha upekkhindriyaṁ uppajjatīti? Ñāṇasampayuttānaṁ vinā upekkhāya upapajjantānaṁ pavatte ñāṇasampayuttaupekkhāvippayuttacittassa uppādakkhaṇe tesaṁ tattha paññindriyaṁ uppajjati, no ca tesaṁ tattha upekkhindriyaṁ uppajjati. Ñāṇasampayuttānaṁ upekkhāya upapajjantānaṁ pavatte ñāṇasampayuttaupekkhāsampayuttacittassa uppādakkhaṇe tesaṁ tattha paññindriyañca uppajjati upekkhindriyañca uppajjati. Yassa yattha upekkhindriyaṁ uppajjati tassa tattha manindriyaṁ uppajjatīti? Āmantā. Yassa vā pana yattha manindriyaṁ uppajjati tassa tattha upekkhindriyaṁ uppajjatīti? Sacittakānaṁ vinā upekkhāya upapajjantānaṁ pavatte upekkhāvippayuttacittassa uppādakkhaṇe tesaṁ tattha manindriyaṁ uppajjati, no ca tesaṁ tattha upekkhindriyaṁ uppajjati. Upekkhāya upapajjantānaṁ pavatte upekkhāsampayuttacittassa uppādakkhaṇe tesaṁ tattha manindriyañca uppajjati upekkhindriyañca uppajjati. (Upekkhindriyamūlakaṁ.)