Yassa vā pana yattha jīvitindriyaṁ na uppajjissati tassa tattha purisindriyaṁ na uppajjissatīti? Āmantā. Yassa yattha purisindriyaṁ na uppajjissati tassa tattha somanassindriyaṁ na uppajjissatīti? Rūpāvacarānaṁ yā ca itthiyo eteneva bhāvena katici bhave dassetvā somanassena upapajjitvā parinibbāyissanti tesaṁ tattha purisindriyaṁ na uppajjissati, no ca tesaṁ tattha somanassindriyaṁ na uppajjissati. Pañcavokāre pacchimabhavikānaṁ asaññasattānaṁ arūpānaṁ yā ca itthiyo eteneva bhāvena katici bhave dassetvā upekkhāya upapajjitvā parinibbāyissanti tesaṁ tattha purisindriyañca na uppajjissati somanassindriyañca na uppajjissati. Yassa vā pana yattha somanassindriyaṁ na uppajjissati tassa tattha purisindriyaṁ na uppajjissatīti? Ye purisā eteneva bhāvena katici bhave dassetvā upekkhāya upapajjitvā parinibbāyissanti tesaṁ tattha somanassindriyaṁ na uppajjissati, no ca tesaṁ tattha purisindriyaṁ na uppajjissati. Pañcavokāre pacchimabhavikānaṁ asaññasattānaṁ arūpānaṁ yā ca itthiyo eteneva bhāvena katici bhave dassetvā upekkhāya upapajjitvā parinibbāyissanti tesaṁ tattha somanassindriyañca na uppajjissati purisindriyañca na uppajjissati.