Kāmāvacare pacchimabhavikānaṁ yā ca itthiyo eteneva bhāvena katici bhave dassetvā parinibbāyissanti tesaṁ tattha itthindriyaṁ uppajjittha, no ca tesaṁ tattha purisindriyaṁ uppajjissati. Itaresaṁ kāmāvacarānaṁ tesaṁ tattha itthindriyañca uppajjittha purisindriyañca uppajjissati. Yassa vā pana yattha purisindriyaṁ uppajjissati tassa tattha itthindriyaṁ uppajjitthāti? Āmantā. Yassa yattha itthindriyaṁ uppajjittha tassa tattha jīvitindriyaṁ uppajjissatīti? Kāmāvacare pacchimabhavikānaṁ tesaṁ tattha itthindriyaṁ uppajjittha, no ca tesaṁ tattha jīvitindriyaṁ uppajjissati. Itaresaṁ kāmāvacarānaṁ tesaṁ tattha itthindriyañca uppajjittha jīvitindriyañca uppajjissati. Yassa vā pana yattha jīvitindriyaṁ uppajjissati tassa tattha itthindriyaṁ uppajjitthāti? Rūpāvacarānaṁ arūpāvacarānaṁ tesaṁ tattha jīvitindriyaṁ uppajjissati, no ca tesaṁ tattha itthindriyaṁ uppajjittha. Kāmāvacarānaṁ tesaṁ tattha jīvitindriyañca uppajjissati itthindriyañca uppajjittha. Yassa yattha itthindriyaṁ uppajjittha tassa tattha somanassindriyaṁ uppajjissatīti? Kāmāvacare pacchimabhavikānaṁ yā ca itthiyo upekkhāya upapajjitvā parinibbāyissanti tesaṁ tattha itthindriyaṁ uppajjittha, no ca tesaṁ tattha somanassindriyaṁ uppajjissati. Itaresaṁ kāmāvacarānaṁ tesaṁ tattha itthindriyañca uppajjittha somanassindriyañca uppajjissati. Yassa vā pana yattha somanassindriyaṁ uppajjissati tassa tattha itthindriyaṁ uppajjitthāti?
