Sabbesaṁ upapajjantānaṁ pavatte akusalavippayuttacittassa uppādakkhaṇe tesaṁ tattha abyākatā dhammā uppajjanti, no ca tesaṁ tattha akusalā dhammā uppajjanti. Pañcavokāre akusalānaṁ uppādakkhaṇe tesaṁ tattha abyākatā ca dhammā uppajjanti akusalā ca dhammā uppajjanti. 9.2.1.1.4. Paccanīkapuggala Yassa kusalā dhammā na uppajjanti tassa akusalā dhammā na uppajjantīti? Akusalānaṁ uppādakkhaṇe tesaṁ kusalā dhammā na uppajjanti, no ca tesaṁ akusalā dhammā na uppajjanti. Sabbesaṁ cittassa bhaṅgakkhaṇe kusalavippayuttaakusalavippayuttacittassa uppādakkhaṇe nirodhasamāpannānaṁ asaññasattānaṁ tesaṁ kusalā ca dhammā na uppajjanti akusalā ca dhammā na uppajjanti. Yassa vā pana akusalā dhammā na uppajjanti tassa kusalā dhammā na uppajjantīti? Kusalānaṁ uppādakkhaṇe tesaṁ akusalā dhammā na uppajjanti, no ca tesaṁ kusalā dhammā na uppajjanti. Sabbesaṁ cittassa bhaṅgakkhaṇe akusalavippayuttakusalavippayuttacittassa uppādakkhaṇe nirodhasamāpannānaṁ asaññasattānaṁ tesaṁ akusalā ca dhammā na uppajjanti kusalā ca dhammā na uppajjanti. Yassa kusalā dhammā na uppajjanti tassa abyākatā dhammā na uppajjantīti?