Sacittakānaṁ aghānakānaṁ upapajjantānaṁ tesaṁ tattha manindriyaṁ uppajjati, no ca tesaṁ tattha ghānindriyaṁ uppajjati. Saghānakānaṁ upapajjantānaṁ tesaṁ tattha manindriyañca uppajjati ghānindriyañca uppajjati. (Ghānindriyamūlakaṁ.) Yassa yattha itthindriyaṁ uppajjati tassa tattha purisindriyaṁ uppajjatīti? No. Yassa vā pana yattha purisindriyaṁ uppajjati tassa tattha itthindriyaṁ uppajjatīti? No. Yassa yattha itthindriyaṁ uppajjati tassa tattha jīvitindriyaṁ uppajjatīti? Āmantā. Yassa vā pana yattha jīvitindriyaṁ uppajjati tassa tattha itthindriyaṁ uppajjatīti? Na itthīnaṁ upapajjantānaṁ tesaṁ tattha jīvitindriyaṁ uppajjati, no ca tesaṁ tattha itthindriyaṁ uppajjati. Itthīnaṁ upapajjantīnaṁ tāsaṁ tattha jīvitindriyañca uppajjati itthindriyañca uppajjati. Yassa yattha itthindriyaṁ uppajjati tassa tattha somanassindriyaṁ uppajjatīti? Itthīnaṁ vinā somanassena upapajjantīnaṁ tāsaṁ tattha itthindriyaṁ uppajjati, no ca tāsaṁ tattha somanassindriyaṁ uppajjati. Itthīnaṁ somanassena upapajjantīnaṁ tāsaṁ tattha itthindriyañca uppajjati somanassindriyañca uppajjati. Yassa vā pana yattha somanassindriyaṁ uppajjati tassa tattha itthindriyaṁ uppajjatīti? Somanassena na itthīnaṁ upapajjantānaṁ tesaṁ tattha somanassindriyaṁ uppajjati, no ca tesaṁ tattha itthindriyaṁ uppajjati. Somanassena itthīnaṁ upapajjantīnaṁ tāsaṁ tattha somanassindriyañca uppajjati itthindriyañca uppajjati.