Yassa yattha saddhindriyaṁ uppajjittha tassa tattha paññindriyaṁ …pe… manindriyaṁ uppajjissatīti? Pacchimacittasamaṅgīnaṁ tesaṁ tattha saddhindriyaṁ uppajjittha, no ca tesaṁ tattha manindriyaṁ uppajjissati. Itaresaṁ catuvokārānaṁ pañcavokārānaṁ tesaṁ tattha saddhindriyañca uppajjittha manindriyañca uppajjissati. Yassa vā pana yattha manindriyaṁ uppajjissati tassa tattha saddhindriyaṁ uppajjitthāti? Suddhāvāsaṁ upapajjantānaṁ tesaṁ tattha manindriyaṁ uppajjissati, no ca tesaṁ tattha saddhindriyaṁ uppajjittha. Itaresaṁ catuvokārānaṁ pañcavokārānaṁ tesaṁ tattha manindriyañca uppajjissati saddhindriyañca uppajjittha. (Saddhindriyamūlakaṁ.) Yassa yattha paññindriyaṁ uppajjittha tassa tattha manindriyaṁ uppajjissatīti? Pacchimacittasamaṅgīnaṁ tesaṁ tattha paññindriyaṁ uppajjittha, no ca tesaṁ tattha manindriyaṁ uppajjissati. Itaresaṁ catuvokārānaṁ pañcavokārānaṁ tesaṁ tattha paññindriyañca uppajjittha manindriyañca uppajjissati. Yassa vā pana yattha manindriyaṁ uppajjissati tassa tattha paññindriyaṁ uppajjitthāti? Suddhāvāsaṁ upapajjantānaṁ tesaṁ tattha manindriyaṁ uppajjissati, no ca tesaṁ tattha paññindriyaṁ uppajjittha. Itaresaṁ catuvokārānaṁ pañcavokārānaṁ tesaṁ tattha manindriyañca uppajjissati paññindriyañca uppajjittha. (Paññindriyamūlakaṁ.) 10.2.1.6.4. Paccanīkapuggala