Yassa yattha purisindriyaṁ uppajjittha tassa tattha saddhindriyaṁ …pe… paññindriyaṁ …pe… manindriyaṁ uppajjissatīti? Kāmāvacare pacchimabhavikānaṁ tesaṁ tattha purisindriyaṁ uppajjittha, no ca tesaṁ tattha manindriyaṁ uppajjissati. Itaresaṁ kāmāvacarānaṁ tesaṁ tattha purisindriyañca uppajjittha manindriyañca uppajjissati. Yassa vā pana yattha manindriyaṁ uppajjissati tassa tattha purisindriyaṁ uppajjitthāti? Rūpāvacarānaṁ arūpāvacarānaṁ tesaṁ tattha manindriyaṁ uppajjissati, no ca tesaṁ tattha purisindriyaṁ uppajjittha. Kāmāvacarānaṁ tesaṁ tattha manindriyañca uppajjissati purisindriyañca uppajjittha. (Purisindriyamūlakaṁ.) Yassa yattha jīvitindriyaṁ uppajjittha tassa tattha somanassindriyaṁ uppajjissatīti?