Yassa vā pana yattha manindriyaṁ na uppajjissati tassa tattha ghānindriyaṁ na uppajjatīti? Pacchimabhavikānaṁ saghānakānaṁ upapajjantānaṁ tesaṁ tattha manindriyaṁ na uppajjissati, no ca tesaṁ tattha ghānindriyaṁ na uppajjati. Kāmāvacare parinibbantānaṁ rūpāvacare arūpāvacare pacchimabhavikānaṁ asaññasattānaṁ tesaṁ tattha manindriyañca na uppajjissati ghānindriyañca na uppajjati. (Ghānindriyamūlakaṁ.) Yassa yattha itthindriyaṁ na uppajjati tassa tattha purisindriyaṁ na uppajjissatīti? Kāmāvacarā cavantānaṁ na itthīnaṁ kāmāvacaraṁ upapajjantānaṁ tesaṁ tattha itthindriyaṁ na uppajjati, no ca tesaṁ tattha purisindriyaṁ na uppajjissati. Kāmāvacare parinibbantānaṁ rūpāvacarānaṁ arūpāvacarānaṁ yā ca itthiyo eteneva bhāvena katici bhave dassetvā parinibbāyissanti tāsaṁ cavantīnaṁ tesaṁ tattha itthindriyañca na uppajjati purisindriyañca na uppajjissati. Yassa vā pana yattha purisindriyaṁ na uppajjissati tassa tattha itthindriyaṁ na uppajjatīti?