Sacakkhukānaṁ vinā upekkhāya upapajjantānaṁ tesaṁ tattha cakkhundriyaṁ uppajjati, no ca tesaṁ tattha upekkhindriyaṁ uppajjati. Sacakkhukānaṁ upekkhāya upapajjantānaṁ tesaṁ tattha cakkhundriyañca uppajjati upekkhindriyañca uppajjati. Yassa vā pana yattha upekkhindriyaṁ uppajjati tassa tattha cakkhundriyaṁ uppajjatīti? Upekkhāya acakkhukānaṁ upapajjantānaṁ tesaṁ tattha upekkhindriyaṁ uppajjati, no ca tesaṁ tattha cakkhundriyaṁ uppajjati. Upekkhāya sacakkhukānaṁ upapajjantānaṁ tesaṁ tattha upekkhindriyañca uppajjati cakkhundriyañca uppajjati. Yassa yattha cakkhundriyaṁ uppajjati tassa tattha saddhindriyaṁ uppajjatīti? Sacakkhukānaṁ ahetukānaṁ upapajjantānaṁ tesaṁ tattha cakkhundriyaṁ uppajjati, no ca tesaṁ tattha saddhindriyaṁ uppajjati. Sacakkhukānaṁ sahetukānaṁ upapajjantānaṁ tesaṁ tattha cakkhundriyañca uppajjati saddhindriyañca uppajjati. Yassa vā pana yattha saddhindriyaṁ uppajjati tassa tattha cakkhundriyaṁ uppajjatīti? Sahetukānaṁ acakkhukānaṁ upapajjantānaṁ tesaṁ tattha saddhindriyaṁ uppajjati, no ca tesaṁ tattha cakkhundriyaṁ uppajjati. Sahetukānaṁ sacakkhukānaṁ upapajjantānaṁ tesaṁ tattha saddhindriyañca uppajjati cakkhundriyañca uppajjati. Yassa yattha cakkhundriyaṁ uppajjati tassa tattha paññindriyaṁ uppajjatīti? Sacakkhukānaṁ ñāṇavippayuttānaṁ upapajjantānaṁ tesaṁ tattha cakkhundriyaṁ uppajjati, no ca tesaṁ tattha paññindriyaṁ uppajjati. Sacakkhukānaṁ ñāṇasampayuttānaṁ upapajjantānaṁ tesaṁ tattha cakkhundriyañca uppajjati paññindriyañca uppajjati.