Kāmāvacarā cavantānaṁ aghānakānaṁ kāmāvacaraṁ upapajjantānaṁ rūpāvacarānaṁ tesaṁ tattha somanassindriyaṁ uppajjittha, no ca tesaṁ tattha ghānindriyaṁ uppajjati. Saghānakānaṁ upapajjantānaṁ tesaṁ tattha somanassindriyañca uppajjittha ghānindriyañca uppajjati. Yassa yattha ghānindriyaṁ uppajjati tassa tattha upekkhindriyaṁ uppajjitthāti? Āmantā. Yassa vā pana yattha upekkhindriyaṁ uppajjittha tassa tattha ghānindriyaṁ uppajjatīti? Kāmāvacarā cavantānaṁ aghānakānaṁ kāmāvacaraṁ upapajjantānaṁ rūpāvacarānaṁ arūpāvacarānaṁ tesaṁ tattha upekkhindriyaṁ uppajjittha, no ca tesaṁ tattha ghānindriyaṁ uppajjati. Saghānakānaṁ upapajjantānaṁ tesaṁ tattha upekkhindriyañca uppajjittha ghānindriyañca uppajjati. Yassa yattha ghānindriyaṁ uppajjati tassa tattha saddhindriyaṁ …pe… paññindriyaṁ …pe… manindriyaṁ uppajjitthāti? Āmantā. Yassa vā pana yattha manindriyaṁ uppajjittha tassa tattha ghānindriyaṁ uppajjatīti? Kāmāvacarā cavantānaṁ aghānakānaṁ kāmāvacaraṁ upapajjantānaṁ rūpāvacarānaṁ arūpāvacarānaṁ tesaṁ tattha manindriyaṁ uppajjittha, no ca tesaṁ tattha ghānindriyaṁ uppajjati. Saghānakānaṁ upapajjantānaṁ tesaṁ tattha manindriyañca uppajjittha ghānindriyañca uppajjati. (Ghānindriyamūlakaṁ.) Yassa yattha itthindriyaṁ uppajjati tassa tattha purisindriyaṁ uppajjitthāti? Āmantā.