Yassa saddhindriyaṁ uppajjati tassa paññindriyaṁ uppajjatīti? Sahetukānaṁ ñāṇavippayuttānaṁ upapajjantānaṁ pavatte saddhāsampayuttañāṇavippayuttacittassa uppādakkhaṇe tesaṁ saddhindriyaṁ uppajjati, no ca tesaṁ paññindriyaṁ uppajjati. Sahetukānaṁ ñāṇasampayuttānaṁ upapajjantānaṁ pavatte saddhāsampayuttañāṇasampayuttacittassa uppādakkhaṇe tesaṁ saddhindriyañca uppajjati paññindriyañca uppajjati. Yassa vā pana paññindriyaṁ uppajjati tassa saddhindriyaṁ uppajjatīti? Āmantā. Yassa saddhindriyaṁ uppajjati tassa manindriyaṁ uppajjatīti? Āmantā. Yassa vā pana manindriyaṁ uppajjati tassa saddhindriyaṁ uppajjatīti? Sacittakānaṁ ahetukānaṁ upapajjantānaṁ pavatte saddhāvippayuttacittassa uppādakkhaṇe tesaṁ manindriyaṁ uppajjati, no ca tesaṁ saddhindriyaṁ uppajjati. Sahetukānaṁ upapajjantānaṁ pavatte saddhāsampayuttacittassa uppādakkhaṇe tesaṁ manindriyañca uppajjati saddhindriyañca uppajjati. (Saddhindriyamūlakaṁ.) Yassa paññindriyaṁ uppajjati tassa manindriyaṁ uppajjatīti? Āmantā. Yassa vā pana manindriyaṁ uppajjati tassa paññindriyaṁ uppajjatīti?