Pacchimabhavikānaṁ itthīnaṁ upapajjantīnaṁ tāsaṁ manindriyaṁ na uppajjissati, no ca tāsaṁ itthindriyaṁ na uppajjati. Kāmāvacare parinibbantānaṁ rūpāvacare arūpāvacare pacchimabhavikānaṁ tesaṁ manindriyañca na uppajjissati itthindriyañca na uppajjati. (Itthindriyamūlakaṁ.) Yassa purisindriyaṁ na uppajjati tassa jīvitindriyaṁ na uppajjissatīti? Sabbesaṁ cavantānaṁ na purisānaṁ upapajjantānaṁ tesaṁ purisindriyaṁ na uppajjati, no ca tesaṁ jīvitindriyaṁ na uppajjissati. Kāmāvacare parinibbantānaṁ rūpāvacare arūpāvacare pacchimabhavikānaṁ tesaṁ purisindriyañca na uppajjati jīvitindriyañca na uppajjissati. Yassa vā pana jīvitindriyaṁ na uppajjissati tassa purisindriyaṁ na uppajjatīti? Pacchimabhavikānaṁ purisānaṁ upapajjantānaṁ tesaṁ jīvitindriyaṁ na uppajjissati, no ca tesaṁ purisindriyaṁ na uppajjati. Kāmāvacare parinibbantānaṁ rūpāvacare arūpāvacare pacchimabhavikānaṁ tesaṁ jīvitindriyañca na uppajjissati purisindriyañca na uppajjati. Yassa purisindriyaṁ na uppajjati tassa somanassindriyaṁ na uppajjissatīti? Sabbesaṁ cavantānaṁ na purisānaṁ upapajjantānaṁ tesaṁ purisindriyaṁ na uppajjati, no ca tesaṁ somanassindriyaṁ na uppajjissati. Kāmāvacare parinibbantānaṁ rūpāvacare arūpāvacare pacchimabhavikānaṁ ye ca upekkhāya upapajjitvā parinibbāyissanti tesaṁ cavantānaṁ tesaṁ purisindriyañca na uppajjati somanassindriyañca na uppajjissati. Yassa vā pana somanassindriyaṁ na uppajjissati tassa purisindriyaṁ na uppajjatīti?