Rūpāvacarānaṁ arūpāvacarānaṁ tesaṁ tattha ghānindriyaṁ na uppajjissati, no ca tesaṁ tattha upekkhindriyaṁ na uppajjissati. Pacchimabhavikānaṁ asaññasattānaṁ tesaṁ tattha ghānindriyañca na uppajjissati upekkhindriyañca na uppajjissati. Yassa vā pana yattha upekkhindriyaṁ na uppajjissati tassa tattha ghānindriyaṁ na uppajjissatīti? Ye saghānakā somanassena upapajjitvā parinibbāyissanti tesaṁ tattha upekkhindriyaṁ na uppajjissati, no ca tesaṁ tattha ghānindriyaṁ na uppajjissati. Pacchimabhavikānaṁ asaññasattānaṁ tesaṁ tattha upekkhindriyañca na uppajjissati ghānindriyañca na uppajjissati. Yassa yattha ghānindriyaṁ na uppajjissati tassa tattha saddhindriyaṁ …pe… paññindriyaṁ …pe… manindriyaṁ na uppajjissatīti? Rūpāvacarānaṁ arūpāvacarānaṁ tesaṁ tattha ghānindriyaṁ na uppajjissati, no ca tesaṁ tattha manindriyaṁ na uppajjissati. Pacchimabhavikānaṁ asaññasattānaṁ tesaṁ tattha ghānindriyañca na uppajjissati manindriyañca na uppajjissati. Yassa vā pana yattha manindriyaṁ na uppajjissati tassa tattha ghānindriyaṁ na uppajjissatīti? Āmantā. (Ghānindriyamūlakaṁ.) Yassa yattha itthindriyaṁ na uppajjissati tassa tattha purisindriyaṁ na uppajjissatīti? Ye purisā eteneva bhāvena katici bhave dassetvā parinibbāyissanti tesaṁ tattha itthindriyaṁ na uppajjissati, no ca tesaṁ tattha purisindriyaṁ na uppajjissati. Kāmāvacare pacchimabhavikānaṁ rūpāvacarānaṁ arūpāvacarānaṁ tesaṁ tattha itthindriyañca na uppajjissati purisindriyañca na uppajjissati.