Yassa jīvitindriyaṁ na uppajjati tassa saddhindriyaṁ …pe… paññindriyaṁ …pe… manindriyaṁ na uppajjissatīti? Sabbesaṁ cavantānaṁ pavatte cittassa bhaṅgakkhaṇe tesaṁ jīvitindriyaṁ na uppajjati, no ca tesaṁ manindriyaṁ na uppajjissati. Pacchimacittassa bhaṅgakkhaṇe tesaṁ jīvitindriyañca na uppajjati manindriyañca na uppajjissati. Yassa vā pana manindriyaṁ na uppajjissati tassa jīvitindriyaṁ na uppajjatīti? Pacchimacittassa uppādakkhaṇe tesaṁ manindriyaṁ na uppajjissati, no ca tesaṁ jīvitindriyaṁ na uppajjati. Pacchimacittassa bhaṅgakkhaṇe tesaṁ manindriyañca na uppajjissati jīvitindriyañca na uppajjati. (Jīvitindriyamūlakaṁ.) Yassa somanassindriyaṁ na uppajjati tassa upekkhindriyaṁ na uppajjissatīti? Sabbesaṁ cittassa bhaṅgakkhaṇe somanassavippayuttacittassa uppādakkhaṇe nirodhasamāpannānaṁ asaññasattānaṁ tesaṁ somanassindriyaṁ na uppajjati, no ca tesaṁ upekkhindriyaṁ na uppajjissati. Somanassasampayuttapacchimacittassa bhaṅgakkhaṇe upekkhāsampayuttapacchimacittasamaṅgīnaṁ yassa cittassa anantarā somanassasampayuttapacchimacittaṁ uppajjissati tassa cittassa bhaṅgakkhaṇe tesaṁ somanassindriyañca na uppajjati upekkhindriyañca na uppajjissati. Yassa vā pana upekkhindriyaṁ na uppajjissati tassa somanassindriyaṁ na uppajjatīti?