Yassa yattha akusalā dhammā uppajjissanti tassa tattha abyākatā dhammā nirujjhissantīti? Āmantā. Yassa vā pana yattha abyākatā dhammā nirujjhissanti tassa tattha akusalā dhammā uppajjissantīti? Aggamaggasamaṅgīnaṁ arahantānaṁ yassa cittassa anantarā aggamaggaṁ paṭilabhissanti, asaññasattānaṁ tesaṁ tattha abyākatā dhammā nirujjhissanti, no ca tesaṁ tattha akusalā dhammā uppajjissanti. Itaresaṁ catuvokārānaṁ pañcavokārānaṁ tesaṁ tattha abyākatā ca dhammā nirujjhissanti akusalā ca dhammā uppajjissanti. 9.2.3.3.4. Paccanīkapuggala Yassa kusalā dhammā na uppajjissanti tassa akusalā dhammā na nirujjhissantīti? Āmantā. Yassa vā pana akusalā dhammā na nirujjhissanti tassa kusalā dhammā na uppajjissantīti? Yassa cittassa anantarā aggamaggaṁ paṭilabhissanti tesaṁ akusalā dhammā na nirujjhissanti, no ca tesaṁ kusalā dhammā na uppajjissanti. Aggamaggasamaṅgīnaṁ arahantānaṁ tesaṁ akusalā ca dhammā na nirujjhissanti kusalā ca dhammā na uppajjissanti. Yassa kusalā dhammā na uppajjissanti tassa abyākatā dhammā na nirujjhissantīti? Aggamaggasamaṅgīnaṁ arahantānaṁ tesaṁ kusalā dhammā na uppajjissanti, no ca tesaṁ abyākatā dhammā na nirujjhissanti. Pacchimacittassa bhaṅgakkhaṇe tesaṁ kusalā ca dhammā na uppajjissanti abyākatā ca dhammā na nirujjhissanti.