Ñāṇavippayuttānaṁ upekkhāya upapajjantānaṁ pavatte ñāṇavippayuttaupekkhāsampayuttacittassa uppādakkhaṇe tesaṁ tattha paññindriyaṁ na uppajjati, no ca tesaṁ tattha upekkhindriyaṁ na uppajjati. Sabbesaṁ cittassa bhaṅgakkhaṇe ñāṇavippayuttaupekkhāvippayuttacittassa uppādakkhaṇe asaññasattānaṁ tesaṁ tattha paññindriyañca na uppajjati upekkhindriyañca na uppajjati. Yassa yattha upekkhindriyaṁ na uppajjati tassa tattha manindriyaṁ na uppajjatīti? Vinā upekkhāya sacittakānaṁ upapajjantānaṁ pavatte upekkhāvippayuttacittassa uppādakkhaṇe tesaṁ tattha upekkhindriyaṁ na uppajjati, no ca tesaṁ tattha manindriyaṁ na uppajjati. Sabbesaṁ cittassa bhaṅgakkhaṇe asaññasattānaṁ tesaṁ tattha upekkhindriyañca na uppajjati manindriyañca na uppajjati. Yassa vā pana yattha manindriyaṁ na uppajjati tassa tattha upekkhindriyaṁ na uppajjatīti? Āmantā. (Upekkhindriyamūlakaṁ.) Yassa yattha saddhindriyaṁ na uppajjati tassa tattha paññindriyaṁ na uppajjatīti? Āmantā. Yassa vā pana yattha paññindriyaṁ na uppajjati tassa tattha saddhindriyaṁ na uppajjatīti? Ñāṇavippayuttānaṁ sahetukānaṁ upapajjantānaṁ pavatte ñāṇavippayuttasaddhāsampayuttacittassa uppādakkhaṇe tesaṁ tattha paññindriyaṁ na uppajjati, no ca tesaṁ tattha saddhindriyaṁ na uppajjati. Sabbesaṁ cittassa bhaṅgakkhaṇe ñāṇavippayuttasaddhāvippayuttacittassa uppādakkhaṇe asaññasattānaṁ tesaṁ tattha paññindriyañca na uppajjati saddhindriyañca na uppajjati.