Pacchimabhavikānaṁ itthīnaṁ upapajjantīnaṁ yā ca itthiyo eteneva bhāvena katici bhave dassetvā parinibbāyissanti tāsaṁ upapajjantīnaṁ tāsaṁ tattha purisindriyaṁ na uppajjissati, no ca tāsaṁ tattha itthindriyaṁ na uppajjati. Kāmāvacare parinibbantānaṁ rūpāvacarānaṁ arūpāvacarānaṁ yā ca itthiyo eteneva bhāvena katici bhave dassetvā parinibbāyissanti tāsaṁ cavantīnaṁ tesaṁ tattha purisindriyañca na uppajjissati itthindriyañca na uppajjati. Yassa yattha itthindriyaṁ na uppajjati tassa tattha jīvitindriyaṁ na uppajjissatīti? Kāmāvacarā cavantānaṁ na itthīnaṁ kāmāvacaraṁ upapajjantānaṁ rūpāvacarānaṁ arūpāvacarānaṁ tesaṁ tattha itthindriyaṁ na uppajjati, no ca tesaṁ tattha jīvitindriyaṁ na uppajjissati. Kāmāvacare parinibbantānaṁ rūpāvacare arūpāvacare pacchimabhavikānaṁ tesaṁ tattha itthindriyañca na uppajjati jīvitindriyañca na uppajjissati. Yassa vā pana yattha jīvitindriyaṁ na uppajjissati tassa tattha itthindriyaṁ na uppajjatīti? Pacchimabhavikānaṁ itthīnaṁ upapajjantīnaṁ tāsaṁ tattha jīvitindriyaṁ na uppajjissati, no ca tāsaṁ tattha itthindriyaṁ na uppajjati. Kāmāvacare parinibbantānaṁ rūpāvacare arūpāvacare pacchimabhavikānaṁ tesaṁ tattha jīvitindriyañca na uppajjissati itthindriyañca na uppajjati. Yassa yattha itthindriyaṁ na uppajjati tassa tattha somanassindriyaṁ na uppajjissatīti?