Aghānakānaṁ sahetukānaṁ upapajjantānaṁ tesaṁ tattha ghānindriyaṁ na uppajjati, no ca tesaṁ tattha saddhindriyaṁ na uppajjati. Sabbesaṁ cavantānaṁ aghānakānaṁ ahetukānaṁ upapajjantānaṁ tesaṁ tattha ghānindriyañca na uppajjati saddhindriyañca na uppajjati. Yassa vā pana yattha saddhindriyaṁ na uppajjati tassa tattha ghānindriyaṁ na uppajjatīti? Ahetukānaṁ saghānakānaṁ upapajjantānaṁ tesaṁ tattha saddhindriyaṁ na uppajjati, no ca tesaṁ tattha ghānindriyaṁ na uppajjati. Sabbesaṁ cavantānaṁ ahetukānaṁ aghānakānaṁ upapajjantānaṁ tesaṁ tattha saddhindriyañca na uppajjati ghānindriyañca na uppajjati. Yassa yattha ghānindriyaṁ na uppajjati tassa tattha paññindriyaṁ na uppajjatīti? Aghānakānaṁ ñāṇasampayuttānaṁ upapajjantānaṁ tesaṁ tattha ghānindriyaṁ na uppajjati, no ca tesaṁ tattha paññindriyaṁ na uppajjati. Sabbesaṁ cavantānaṁ aghānakānaṁ ñāṇavippayuttānaṁ upapajjantānaṁ tesaṁ tattha ghānindriyañca na uppajjati paññindriyañca na uppajjati. Yassa vā pana yattha paññindriyaṁ na uppajjati tassa tattha ghānindriyaṁ na uppajjatīti? Ñāṇavippayuttānaṁ saghānakānaṁ upapajjantānaṁ tesaṁ tattha paññindriyaṁ na uppajjati, no ca tesaṁ tattha ghānindriyaṁ na uppajjati. Sabbesaṁ cavantānaṁ ñāṇavippayuttānaṁ aghānakānaṁ upapajjantānaṁ tesaṁ tattha paññindriyañca na uppajjati ghānindriyañca na uppajjati. Yassa yattha ghānindriyaṁ na uppajjati tassa tattha manindriyaṁ na uppajjatīti?